المدارس الكاثوليكية في لبنان والكفر

بقلم/الياس بجاني*

 

سؤال صريح ومباشر نوجهه إلى صرح بكركي وإلى كل الصروح الكاثوليكية اللبنانية والفاتيكانية وإلى كافة المسؤولين وعلى مختلف المستويات عن المدارس الكاثوليكية المنتشرة في كل أرجاء لبنان، وهو هل هذه المدارس وسائل تجارية تبغي الربح؟ أم أنها مؤسسات دينية وتعليمية هدفها الأسمى تثقيف المسيحي انجيلياً وقيمياً وحياتياً وصقل معرفته لتكون حياته الفكرية والإيمانية وممارساته تحت سقف الإيمان وسلاحه المحبة والعطاء ومخافة الرب؟

 

وهل هي للمسيحي الغني القادر والمقتدر على دفع تكاليفها فقط، أم أنها للفقراء من المسيحيين الذين لا تمكنهم قدراتهم المالية من تعليم أولادهم؟ نسأل هذه الأسئلة في هذا الوقت بالذات على خلفية وصول أخبار إلينا وهي مؤكدة وموثقة تفيد أن معظم إدارات هذه المدارس تتعامل مع أهالي الطلاب المسيحيين الفقراء بتعالي وكفر وجحود وبالكثير من الإهانات التي تطاول الكرامات بعيداً عن أي قيم ومبادئ وتقوى وهي تمتنع عن إعطاء هؤلاء الأهالي نتائج امتحانات أولادهم ما لم يسددوا الأقساط الموجبة عليهم بالكامل؟

 

لا يا أصحاب الجبب والقلانيس هذا كفر مرفوض وهو أمر لا يجوز ولا يقبله الله ولا يرضي القديسين الذين أنجبهم لبنان. عيب فهذا جحود موصوف وبعيد عن شهادة المسيح وإنجيله ورسله بعد الأرض عن السماء. عيب نعم عيب والعيب هذا يطاول كل من هم وراء هذه الممارسات الأخطاء المميتة. وبعد أتسألون لماذا يهاجر المسيحي. عيب أوقفوا هذه الممارسات وعودوا إلى الالتزام بالهدف الأساس للمدارس الكاثوليكية وخافوا الله واتقوه.

 

ترى هل القيمين على المدارس الكاثوليكية قد تخدرت قلوبهم وصمت أذانهم ومات الإيمان في داخلهم ووقعوا في تجاري ابليس حتى تحولوا إلى ذئاب يفترسون اطفال لبنان المسيحيين ويذلون أهلهم؟ أنه فعلا زمن محل وجحود وكفر

 

باللبناني المشبرح: في اسفل الصرخة التي أطلقتها بحرقة قلب أمس بالصوت من ضمن نشرة أخبار صوت فينيقيا وقد تجند أحد أباء التلاميذ المقهورين في لبنان لكتابتها حرفياً.

 

اليوم المشكلة بتخص كل المدارس الكاثوليكية . بداية الوجع بيوجع اكتر لما بيكون وجع داخلي. وخيبة الامل بتكون اكبر لما بتكون من انسان بتتوقع منه المحبة والخير ومد اليد.

المدارس الكاثلوكية بلبنان مدارس تابعة للكنائس الكاثلوكية والمفترض انه هيدي المدارس حاملة البشارة وعم تحاول تربي اجيال على الايمان وعلى التقوى وعلى مثال "سيدنا يسوع المسيح" بالتضحبة والفداء. وهل المدارس هيدي معمولة بالاساس مش للاغنياء. هيدي المدارس معمولة للناس لعا قد حالن اوضاعن, ويلي ما بيقدروا يعلموا ولادن, وبالتالي هل المدارس الكاثلوكية لها هدف اساسي هو هدف "البشارة" ومع البشارة بيجي التثقيف, لان الانسان المثقف والمتعلم هوي الانسان لبيقدر يحمل البشارة بمفهوم اعمق وبمفهوم اشمل.

 

وللاسف هل المدارس هيدي وصلتنا تقارير من اشخاص معنيين وعندن ولاد بهل المدارس وبكتير مناطق من لبنان وهيدا الموضوع منه جديد وكان انحكى عنه سابقا مرات كتيرة ولكن من دون ما حدا يتحرك من القيميين على هل المدارس وياخذ اية خطوة فيها رحمة.

 

اليوم ومن بعد ماخلص الموسم الدراسي اهالي كتير عم بيروحوا على المدارس بكل المناطق لحتى يجيبو علامات ولادن . هل الناس المعترين لمش قادرين كانو بعد يكفوا الاقساط ويلي ما امتنعوا عن دفعها بس ما معن, وعم بيدفعوا قد ما بيقدرو وعم بيقولو "انطرونا اصبروا علينا ما انتو شايفين الوضع" وهودي الاهالي المعترين بس عم بيروحوا عا المدرسة بدن يجيبو نتائج امتحانات ولادن, عم بيقولولن بالمدرسة الكاثلوكية كل المدارس,

 

ما رح نقلكن العلامات ولا رح نقلكن ولادكن ساقطين او ناجحين الا ما تروحوا تجيبولنا القسط وتجوا....طيب هيدا من وين بده يروح يجيب القسط ؟؟ بروح لعند حزب الله بياخد منه "مال حلال" او بيروح لعند السعودية او امير قطر او عند مين بيروح؟؟ بيروح بيسرق بنك او بيتاجر بالمخدرات ؟؟ من وين بده يجيب هيدا البناني المسيحي يلي ما عنده يدفع القسط ؟؟ طيب هيدي المدارس وين الرحمة؟؟ طيب هيك سؤال صغير وبسيط كتير منسأله "لبكركي"ولكل المرجعيات الكاثلوكية بلبنان والمسوؤلين عن المدارس (ما انتو جماعة رحمة وانتو ندرتوا العفة والطاعة والفقر) ولك اية عفة واية طاعة واية فقر, اذا انتو عم (بتزلوا الناس) وعم (بتزلوا) المؤمنين وعم تكسرو قلوب هل الاولاد المعترين يلي اهاليهن ما عندن يكفوا الاقساط , يعني شو بدكن هودي الاولاد يروحوا يسرقوا ؟ يشحدوا على الطرقات؟ يروحوا يتجندوا عند حزب الله؟ وين بدكن اياهن يروحو ولك استحوا عيب عليكن..... روحوا رموهن هودي القلانيس للابسينهن وهيدي البدلات الاثواب مدنسينها انتو.

 

اذا هيدي ممارساتكن؟ انتوعم بتدنسو هيدي الاثواب وانتو متل الكتبة والفريسيين ... بتقولوا بدنا ناس تجي عا الايمان, وبس يجوا لعندكن من كفركن ومن جحودكن بتقلبوهن وبتخلوهن يصيروا اكتر منكن جحود.... ولك عيب عليكن.. انتو نادرين العفة والطاعة والفقر. هيدي مدارس مفروض تكون حاملة البشارة, هيدي المدارس مفروض تكون عم بتربي اجيالنا. هيدي المدارس مفروض تكون عم بتعلم اللبناني المسيحي انه يحافظ على ارضه ويحافظ على دينه ما يهاجر ما يترك. وبعد منسأل ليه اهلنا عم بيهاجروا ؟؟ يا عيب الشؤم عليكن .. ولك استحوا اخجلوا خافوا ربنا! هودي ولادكن بدكن اياهن يروحوا يسرقوا تا يدفعولكن الاقساط؟ بدكن اهاليهن يروحوا يتاجروا بالمخدرات او يبيعوا بيوتن واراضيهن تا يدفعولكن الاقساط ؟؟ انتو جماعة كفار . انتو جماعة كتبة وفريسيين ومؤرايين . ومن شي قليل بعد منسأل ليه اهلنا عم بيهاجروا من لبنان ؟ وليه المسيحيين كفروا بقيادتن ؟؟ وليه بس بعد في 15 % من المسيحية عم بيروحوا على الكنائس ؟؟ كله من وراكن, من ورا كفركن ومن وراء انجراركن للغرائز ومن وراء تعلقكن بمقتنيات هالدني. تذكروا انتو ربنا داعيكن وانتو قبلتو الدعوة, وندوراتكن هي العفة والطاعة والفقر... ولك وين العفة؟ ومين بتطيعوا انتو؟ واية فقر عم تحكوا فيه؟

 

اليوم نحنا كتبنا كلمة وحطيناها على موقعنا وعلى الفايسبوك عنا , واذ من بعد ما كان عنا حوالي 13 شكوى من ناس باسمائن, لقينا بعض الاهالي كتبوا باسامين وبالمناطق وعم بيسموا مدراء المدارس يلي ما عطيوهن العلامات لاولادن , وعم بيقول واحد منن (فتت عا مدرسة بجونية ولقيت 50 عيلة مثلي ناطرين وكلن مش قادرين يدفعوا وكلن مش قادرين ياخدوا علامات ولادن)!! ولك يا بكركي !!! يا ربـوة !!! يا حريصـا! لوين انتو رايحين؟ انتو ناقصكن مصاري ؟ ناقصكن غنى؟ ناقصكن ارض؟ شو يلي ناقصكن؟ انتبهوا لاولادنا علموهن وربوهن على القيم والمبادىء , او تركوا وشلحوا هيدا الثوب يلي لابسينه, وتركوا الرهبنة وتركوا هيدي الخدمة ورحوا اشتغلوا بالتجارة. هيدي المدارس مكان ووسيلة للبشارة وانتو حولتوها وسيلة للربح والتجارة. يا عيب الشؤم عليكن.

 

ربنا لبدو يحاسبكن, وجريمتكن مضروبة بمليون لانكن انتو اصحاب دعوة, وانتو لاجلسكن "ربنا على عرش داوود". (لوين رايحين) ما بيكفي كانت الاراضي بلبنان 75% للمسيحية واليوم صارت بنتيجة ممارسات متل ممارساتكن وكفر وجحود متل جحودكن صار المسيحي اليوم ما بيملك الا 37% بس والباقي كل يوم وكل ساعة عم بيقل والهجمة عليه من كل المحلات والاغراب. استحوا خافوا ربنا .... هيدي صرخة من القلب من الاغتراب باسم هل الناس كلن يلي ما عندن صوت...

بالنهاية اذا كانت هيدي هي مفاهيمكن وهيدي هي اسس ايمانكن,

روحوا دوروا عا شغلة غير هل الشغلة، وربنا يكون بعون هل الناس .... ونقطة عاالسطر

 

*معلق سياسي وناشط لبناني اغترابي

البريد الالكتروني Phoenicia@hotmail.com

الموقع الالكتروني http://www.10452lccc.com

تورنتو/كندا في 13 تموز/2012